Кыдыралиев Умбеталы Токторалиевич

Күч-биримдикте!

шайлоо алдындагы программасы

 (№ 23 шайлоо округу, Биринчи Май району, Бишкек шаары)

Урматтуу шайлоочулар! Менин атым Умбеталы Кыдыралиев. Мен Кыргыз Республикасынын Жогорку Кеңешинин депутаттыгына талапкерлигимди көрсөтүп жатам. Максатым – Биринчи Май районунун тургундарынын кызыкчылыгын коргоо жана кубаттуу, адилеттүү, заманбап Кыргызстанды өнүктүрүүгө салым кошуу.

Мен 58 жаштамын. Мамлекеттик, башкаруу жана дипломатиялык тармактарда чоң тажрыйбага ээмин. Кыргыз Республикасынын Казакстан Республикасындагы Башкы консулу, Жогорку Кеңештин VI чакырылышынын депутаты жана Конституциялык кеңешменин мүчөсү болуп иштегем. Ал кеңешмеде азыркы күнү өлкөбүз жашап жаткан жаңы Конституцияны даярдоого түздөн-түз катышкам.

«Кыргызалтын» ААК жетектеп турган мезгилде, өлкөбүздүн алтын өндүрүшү үчүн маанилүү болгон LBMA (London Bullion Market Association) эл аралык аккредитациясын кайра калыбына келтирдим. Ошондой эле Кумтөр маселелери боюнча Мамлекеттик комиссиянын төрагасынын орун басары катары Кумтөр кенин Кыргыз Республикасына кайтаруу чечиминин ишке ашуусуна активдүү катыштым. Бул кадам өлкөбүздүн улуттук эгемендүүлүгүн чыңдаган эң маанилүү саясий жана экономикалык чечимдердин бири болду.

Негизги багыттар:

Заманбап транспорт жана ыңгайлуу шаар. Бишкекке азыркы талаптарга жооп берген транспорттук система керек. Интеллектуалдык кыймылды башкаруу, синхрондоштурулган светофорлор, жеке тилкелер жана «Токтот да унаасыз жүр» системасы киргизилет. Унаа тыгындарын азайтуу үчүн көп кабаттуу унаа токтотуучу жайлар курулат.

Экология жана ден соолук. Таза аба жана жашыл шаар – ден соолуктун негизги шарты. Көмүрдөн газга жана күн панелдерине өтүүгө субсидия берүү, шаарды жашылдандыруу, тиричилик калдыктарын бөлүп чогултуу системасын өнүктүрүү, ошондой эле аба менен суунун сапатын көзөмөлдөө чаралары көрүлөт.

Инновациялар жана санариптештирүү. IT-инкубаторлор жана жаштар ишкердик борборлору түзүлөт. Бул – технологиялык билимге жана мүмкүнчүлүктөргө жол ачат. Жаңы стартаптарга колдоо көрсөтүү аркылуу жаштар үчүн жаңы жумуш орундарын түзүү максат кылынат.

Аялдар менен балдарды коргоо. Үй-бүлөлүк жана жыныстык зомбулук үчүн жоопкерчиликти күчөтүү, күнү-түнү укуктук жана психологиялык жардам көрсөтүүчү кризистик борборлорду жана баш калкалоочу жайларды түзүү сунушталат.

Жеткиликтүү турак жай. Депутат катары «Жеткиликтүү турак жай» программасынын аткарылышын жана турак жай бөлүштүрүүнүн адилеттүүлүгүн көзөмөлдөөгө аракет кылам. Биринчи Май району пенсионерлерге, жалгыз бой энелерге жана жаш үй-бүлөлөргө жеңилдетилген ижарадагы социалдык турак жай долбоорунун пилоттук аймагы болуп калат.

Кыргызстан — аймактык хаб. Өлкөбүздү логистика жана санарип соода борборуна айлантуу зарыл.