«Өнүккөн аймак — ар бир үй-бүлөнүн бакубат жашоосу!»

Кириш сөз

Мен — Жапарова Жеңишгүл Молдокеримовна, жөнөкөй мугалим жана шаардык кеңештин учурдагы депутаты.

Күн сайын Токтогул районунун эли кандай кыйынчылыктар менен жашап жатканын өз көзүм менен көрүп келем — турак-жайдын тартыштыгы, жумушсуздук, билим берүүдөгү, саламаттыкты сактоодогу жана экологиядагы көйгөйлөр ар бир үй-бүлөгө таасир этүүдө.

Элимдин жашоосун мен жакшы билем. Ошондуктан  бийлик үчүн эмес, элдин үнүн угузуп, чыныгы өзгөрүүлөргө жетишүү үчүн Жогорку Кеңешке аттандым.

Мыйзам боюнча, Токтогул району — өзгөчө мамлекеттик камкордуктагы аймак, менин негизги максатым — бул аныктама кагаз бетинде эле калбастан, чындыкка айлантуу.

Токтогул району үчүн менин негизги багыттарым

Ар бир үй-бүлөгө — турак-жай!

• Мамлекеттик ипотекалык компания (МИК) аркылуу турак-жайга муктаж жарандарды үй менен камсыз кылуу.
• Жаш үй-бүлөлөргө жана социалдык жактан алсыз жарандарга өз жер тилкесинде үй курганга мүмкүнчүлүк түзүү.
• Ар бир үй-бүлөгө өзүнчө жер тилкеси.
• Жеке турак жай куруу үчүн жер бөлүштүрүүнү акыйкаттуу жана ачык жүргүзүү.

Өндүрүштү калыбына келтирүү — жаңы жумуш орундары!

• Сүт жана этти кайра иштетүүчү заводду экспортко чыгуу мүмкүнчүлүгү менен куруу. Анткени райондун элинин көбү мал чарбачылык жана айыл чарба менен алектенет. Бул потенциалды туруктуу өнүгүүгө айлантуу керек.

• Совет доорундагы май заводун калыбына келтирип, заманбап технологияларды киргизүү менен иштетүү.
• Кичи жана орто ишканаларды колдоо, муну менен жумуш орундарынын көбөйүшү жана миграциянын азайышын алып келет.

Таза жана заманбап Токтогул!

• Мурдагы аэропорттун аймагындагы таштанды полигонун жоюп, экологиялык жактан коопсуз калдык иштетүүчү завод куруу.
• Аэропортту калыбына келтирүү бул — транспорттук жеткиликтүүлүктү жакшыртып, туристтерди жана инвесторлорду тартат, жаңы жумуш орундарын камсыз кылат.

Бюджетти натыйжалуу пайдалануу!

• Азыр Токтогул району ар жылы 70 млн сом атайын фонддон алат. Азыр анын 70% - суу чарбасына, 30% - социалдык объектилерге жумшалууда. Мен мыйзамга өзгөртүү киргизүүнү сунуштайм: 50% — социалдык өнүгүүгө, 50% — суу чарбасына бөлүнүшү керек. Бул каражаттарга: үйлөрдү, мектептерди, ооруканаларды, заводдорду жана жолдорду курууга мүмкүн болот.

Айыл чарбасын жана экспортту өнүктүрүү.

• Районубуз аары чарбачылыгы жана балык чарбачылыгы менен таанымал.
• “Токтогул балы” жана “Токтогул балыгы” деген бренддерди түзүп, экспортко чыгаруу.
• Фермерлерге мамлекеттик колдоо көрсөтүү, жеткиликтүү насыяларды, гранттарды берүү жана жаңы технологияларды үйрөтүү.

Билим — өнүгүүнүн ачкычы жана улуттук рухтун булагы!

• Мугалим катары мен билем: билим — мамлекеттин келечеги. Бүгүн Токтогулда окуучулардын билим сапаты төмөн, окуучулар ОРТдан жогорку упай топтой албай жатышат, ар кандай олимпиадаларда башкы орундарды ээлебейт, ж.б.
• Зарыл чаралар: мугалимдердин квалификациясын жогорулатуу, кадрдык саясатты кайра кароо, мектептерге IT-технологиялар, логика жана робототехника сабактарын киргизүү.
• Балдарыбыз билимине ишенген, өлкөсүн сыймыктануу менен көрсөтө алган жаштар болушу керек.

• Кыргызстанды күчтүү кылган — анын эли, тили жана маданияты.
• Кыргыз тилин жана маданиятын өнүктүрүүчү демилгелерди колдоо.
• Маданий жана спорттук аянтчалар, элдик чыгармачылыкты жана кол өнөрчүлүктү өнүктүрүү.
• Улуттук рух — бул жөн гана сөз эмес, бул өзүн сыйлоо, ата тегине урмат жана келечекке ишеним.

Социалдык коргоо жана жарандык укуктар.

• Социалдык жактан алсыз катмарды, өзгөчө аялдар менен балдарды коргоо.
• Акысыз юридикалык жардам берүүчү борборлорду ачуу жана кеңейтүү.
• Жергиликтуу элди акысыз медициналык текшеруудон откорууну уюштуруу

Туризмди өнүктүрүү.

• Райондун табигый байлыктарын — суусактагычты, тоолорду, токойлорду, жаратылышын — пайдаланып, ички жана эл аралык туризмди өнүктүрүү.
• Экотуризм багытында конок үйлөрүн, этно-комплекстерди, туристтик маршруттарды түзүү.

Жыйынтык

Мен — чиновник эмесмин жана аткара албас убада бербейм.

Мен — мугалим, эне жана Токтогулдун тургуну катары элдин көйгөйүн күн сайын жүрөгүмдөн өткөрөм.

Элге болгон ишеним, ак ниеттик жана мекенге болгон сүйүү менен иш кылсак — Токтогул таза, өнүккөн жана бакубат аймакка айланат.

Ар бир үй-бүлө мамлекеттик камкордукту сезет.

Элге ишеним менен, салтка урмат менен, келечекке үмүт менен — алга, Токтогул!