Намазова Бурул Тилековна 1979-жылы Ысык-Көл районунун Чолпон-Ата шаарында төрөлгөн, улуту кыргыз, жогорку билимдүү. 1995-жылы Ысык-Көл районунун Тамчы айылынын орто мектебин (физика-математикалык багыттагы жана чет тилин терең окуу менен) бүтүргөн.

1995-2000-жылдары Бишкек гуманитардык университетинин “Чыгыш таануу жана эл аралык мамилелер” факультетин “Эл аралык мамилелер, Эл аралык экономикалык мамилелер (Япониянын экономикасы)” адистиги боюнча аяктаган. 2022-жылы Башкаруу, укук, финансы жана бизнес Эл аралык академиясынын юридикалык факультетинин магистратурасын “юриспруденция” багыты боюнча аяктаган.

Намазова Бурул Тилековна Кыргыз Республикасынын Жогорку Кеңешинде 2000-жылдан бери иштеп келе жатат, ошол убактан бери ар кандай кызмат ордун ээлеген, анын ичинде Кыргыз Республикасынын Жогорку Кеңешинин депутатынын жардамчысы, консультанты, Кыргыз Республикасынын Жогорку Кеңешинин Төрагасынын жардамчысы, Кыргыз Республикасынын Жогорку Кеңешинин Адам укуктары, тең мүмкүнчүлүктөр жана коомдук бирикмелер боюнча Комитетинин бөлүмүнүн эксперти кызматында иштеп келген.

2016-жылдын апрелинен тартып 2019-жылдын августуна чейин парламенттик фракциянын катчылыгынын эксперти, ал эми 2019-жылдын декабрына чейин Катчылыктын сектор башчысы кызматында иштеген. 2019-жылдын декабрь айынан Кыргыз Республикасынын Жогорку Кеңешинин Транспорт, коммуникациялар, архитектура жана курулуш боюнча комитетинин бөлүмүнүн эксперти, ал эми 2025-жылдын апрелинен тартып Кыргыз Республикасынын Жогорку Кеңешинин депутаттыгына талапкерлигин көрсөткөнгө чейин Кыргыз Республикасынын Жогорку Кеңешинин Транспорт, коммуникациялар, архитектура жана курулуш боюнча комитетинин Бөлүм башчысынын орун басары кызматында иштеп келе жатат.

Кыргыз Республикасынын Жогорку Кеңешинде иштөө учурунда Намазова Б.Т. актуалдуу мыйзам долбоорлорун, Кыргыз Республикасынын Жогорку Кеңешинин токтомдорун жана башка ченемдик укуктук актыларды иштеп чыгууга активдүү катышкан, шайлоочулар, жарандардын каттары, кайрылуулары менен ар дайым иш алып барган, тиешелүү комитеттердин кароосуна киргизилген мыйзам долбоорлоруна Комитеттин корутундуларын даярдап келген.

Намазова Б.Т. көпчүлүк ченемдик укуктук актылардын долбоорлорун иштеп чыккан, анын ичинде миграцияга тиешелүү жана чет өлкөнүн жарандыгы бар мекендештин статусун алууга мүмкүнчүлүк түзгөн “Мекен Кард” жөнүндө, кошуна мамлекеттерден келип Кыргызстанда иштеген эмгекчи-мигранттарга (салык) патенттик система киргизүү тууралуу жана башка Мыйзам долбоорлорун иштеп чыккан. Ошондой эле, туризмди өнүктүрүү, анын ичинде Ысык-Көл облусунда инфратүзүмдү жакшыртуу, экологияны коргоо зарылчылыгы тууралуу, Евразия экономикалык бирлигине интеграциялоонун шарттарында ата мекендик өндүрүүчүлөрдү, экспорттоочуларды коргоо жана колдоо көрсөтүү, органикалык айыл чарбасын өнүктүрүү тууралуу бир нече Жогорку Кеңештин токтомдорунун долбоорлорун иштеп чыккан.

Кыргыз Республикасынын Жогорку Кеңешинде көп жылдан бери иштөө менен мамлекеттик кызматта иштеген жалпы стажы 24 жылдан ашты, “Мамлекеттик кызматтын I-класстагы кеңешчиси” ченинин ээси. 2018-жылы Кыргыз Республикасынын Жогорку Кеңешинин Ардак грамотасы менен, 2023-жылы Кыргыз Республикасынын Президентинин Жарлыгынын негизинде “Кыргыз Республикасынын Конституциясына 30 жыл" юбилейлик медалы менен сыйланган. “Кыргыз Республикасынын мамлекеттик кызматынын отличниги” төш белгиси менен сыйланган. JICA тарабынан демилгеленген “Айыл-чарба кооперативдеринин өнүгүүсү” аттуу изилдөө боюнча түзүлгөн отчеттун авторлорунун бири.

Ошону менен бирге, Кыргызстанда жана чет өлкөлөрдө өткөн билим берүү курстарынан жана семинарлардан өткөндүгү жөнүндө көп сандаган сертификаттарды алган.

Турмушка чыккан, эки балалуу.