Миссия:
Ысык-Көл аймагы — Кыргыз Республикасынын эң келечеги кең аймактарынын бири болуп саналат. Бул аймакта бир нече тармактык секторлорду өнүктүрүүгө мүмкүнчүлүгү жогору жана ал өлкөнүн экономикалык жыргалчылыгынын тең салмактуу өнүгүшүнө шарт түзөт. Максаттар:
Биздин негизги максатыбыз — Кыргыз Республикасынын мыйзам чыгаруу органын түзүүдө Ысык-Көл облусунун тургундарынын кызыкчылыктарын коргоо, аткаруу бийлигинин ишинин сапатын көзөмөлдөө жана каржы ресурстарын натыйжалуу бөлүштүрүү аркылуу аймактын мүмкүнчүлүктөрүн өнүктүрүү.
Менин талапкерлигим — Ысык-Көл облусундагы ар бир үй-бүлөнүн жашоо сапатын, коопсуздугун жана жыргалчылыгын жакшыртууга кепил боло алат. Бул менин экономика тармагындагы жогорку компетенциям жана жарандык укуктарды коргоо жаатындагы тажрыйбам аркылуу ишке ашат. Максатым - аймактынкайталангыс табигый чөйрөсүн сактап, Ысык-Көлдү өлкөнүн социалдык-экономикалык өнүгүүсүнүн кыймылдаткыч күчүнө айландыруу.
Бул максатка жетүү үчүн - инфраструктуралык долбоорлорду алдыга жылдыруу жана аймактын негизги тармактарына инвестиция тартууга жетишүү.
- Экономикалык өнүгүү жана жеке ишкердикти колдоо
Максат:
Кичи жана орто бизнести өнүктүрүү, ички туризмди жайылтуу жана Ысык-Көл аймагына инвестиция тартуу үчүн ыңгайлуу шарттарды түзүү.
Негизги чаралар:
- Аймактын географиялык өзгөчөлүктөрүнө ылайыкташкан жеңилдетилген насыя программаларын киргизүү;
- Ысык-Көл облусунда ишкерлерди жана стартаптарды,жаңы бизнес долбоорун колдоо боюнча Аймактык борборлорду түзүү;
- Бизнес каттоодогу административдик тоскоолдуктарды азайтуу жана иш жүргүзүү процессин жөнөкөйлөштүрүү;
- Финансылык институттар жана инвесторлор менен өнөктөштүктү өнүктүрүү;
- Кол өнөрчүлүктү өнүктүрүү жана “Made in Issyk-Kul” деген ишенимдүү брендди түзүү.
- Айыл чарба жана фермерлик чарбалар
Максат:
Аймактык кооперацияны колдоо, энергияны үнөмдөөчү технологияларды колдонуу жана продукцияны сактоо менен сатууга ылайыктуу инфраструктураны түзүү аркылуу Ысык-Көл облусунда айыл чарба секторун туруктуу, кирешелүү жана заманбап нукта өнүктүрүү, айыл тургундарынын кирешесин жогорулатуу.
Негизги чаралар:
- Айыл чарба секторунун түшүмдүүлүгүн жана өсүмдүк өстүрүүнүн сапатын жогорулатуу үчүн агрардык секторду өнүктүрүү институтун түзүү;
- Айыл чарба процессинин болжолдуу анализин жүргүзүү, керектүү каражаттарды өз убагында камсыз кылуу жана бөлүштүрүү, ошондой эле продукцияны чогултуу, сактоо жана сатуу процессин көзөмөлдөө;
- Жемиш-жашылча продукцияларын сертификациялоочу мамлекеттик компанияларды түзүү;
- Жогорку тоолуу аймактардагы эт-сүт кооперативдерин колдоо –субсидия аркылуу техника жана жабдууларды сатып алууга жеңилдетилген кредиттерди берүү;
- Фермерлерди заманбап чарба жүргүзүү ыкмаларына жана маркетингге үйрөтүүчү "Агростарт" билим берүү программасын ишке киргизүү;
- "Жашыл дыйканчылыкты" жана сууну үнөмдүү пайдаланууну колдоо;
- Айыл чарбадагы жоготууларды камсыздандырууга мүмкүндүк берген мамлекеттик агрардык камсыздандыруу системасын киргизүү.
- Адамдык капиталды жана социалдык коомду өнүктүрүү
Максат:
Жаштардын өз потенциалын ишке ашыруусуна жана аймактагы адамдык капиталды өнүктүрүүгө шарт түзүү.
Негизги чаралар:
Эл аралык билим берүү студенттик шаарчасын түзүү;
- Жеңил атлетика жана кышкы спорт түрлөрүн өнүктүрүү үчүн бийик тоолуу аймактагы машыгуу базалары менен бирге регионалдык "Спорт кампусун" куруу;
- Эл аралык университеттердин учурдагы филиалдарынын негизинде "Санариптик университеттик кластерди" түзүү, виртуалдык лабораториялар жана жаштар үчүн коворкинг-аймактарды уюштуруу;
- Аялдардын экономика менен саясатка катышуусун кеңейтүү, алардын укуктарын коргоо жана тең мүмкүнчүлүктөрдү камсыз кылуу;
- Социалдык жактан аяр жана бардык катмарды камтыган калк катмарын колдоо жана өнүктүрүү долбоорун ишке ашыруу.
- Экология жана аймактын туруктуу өнүгүүсү
Максат: Ысык-Көл көлүн жана анын айланасындагы экосистеманы келечек муундар үчүн сактап калуу, туризм менен жаратылыштын ортосундагы тең салмактуулукту камсыз кылуу.
Негизги чаралар:
- Ысык-Көл көлүнүн жээк аймактарында суунун сапатын автоматтык түрдө көзөмөлдөө системасын киргизүү жана саркынды сууларды тазалоону экологиялык жактан таза ыкмалар менен жүргүзүү;
- Көлдүн жээгиндеги бардык аймактарда канализация жана тазалоо курулмаларын модернизациялоону жыйынтыктоо;
- "Акылдуу" суу жана электр эсептегичтерин орнотуу, коммуналдык маселелерди ыкчам чечүү үчүн мобилдик портал түзүү;
- Улуттук экологиялык стандарттарга жооп берген, сертификатталган эко-маршруттарды жана чакан конок үйлөрдүн тармагын түзүү;
- Жайыттарды сактоо, сел коркунучтарын алдын алуу жана сууну чогултуу аркылуу сугат жерлерди натыйжалуу пайдаланууга багытталган мигитациялык иш-чараларды күчөтүү.
- Ачык-айкындуулук жана башкаруулук
Максат:
Жарандардын бийликке болгон ишенимин жогорулатуу жана мамлекеттик чечимдердин ачык-айкын болушун камсыз кылуу.
Негизги чаралар:
- "Ачык бюджет" жана жергиликтүү органдардын чыгымдарын онлайн көзөмөлдөө системасын киргизүү;
- "Ачык терезе" жана депутаттардын электрондук петицияларды кабыл алуу менен отчеттуулугун онлайн көзөмөлдөө;
- Акимиаттарда жана райондордун мекемелеринде жамааттык кеңештерди түзүү.
Жыйынтыктап айтканда, сиздерге 20 жылдык башкаруу тажрыйбамды пайдаланып, заманбап чакырыктарга жооп берген жана Ысык-Көл облусу менен Кыргыз Республикасынын бардык жарандарынын кызыкчылыгын коргогон мыйзамдар базасын түзүүгө даяр экенимди билдирем.