ТОЛТОЕВ ЭРНИС МУКАШБЕКОВИЧтин шайлоо алдындагы ПЛАТФОРМАСЫ
№ 9 көп мандаттуу шайлоо округу боюнча (Кара-Суу, Өзгөн райондору)
Мен округдун гана эмес, жалпы Кыргызстандын элинин, парламенттин өкүлү болууну көздөйм. Өлкөбүздүн алдында турган негизги көйгөйлөрдү чечүүгө жигердүү катышам. Мамлекеттик деңгээлдеги төмөнкү багыттарга артыкчылыктуу маани берем:
- Экономиканын туруктуу өнүгүүсүнө, жумуш орундарын түзүүгө, улуттук өндүрүштү экспортко багыттоого өбөлгө түзгөн мыйзамдарды иштеп чыгуу;
- Энергетикалык коопсуздукту мыйзам аркылуу камсыздоо;
- Коррупцияны жоюуга жана башкаруунун сапатын жогорулатууга көмөктөшүү;
- Билим берүүнүн жана медициналык тейлөөнүн сапатын көтөрүүнү укуктук камсыздоо;
- Регионалдык соода, транспорт жана энергетика байланыштарын кеңейтүү;
- Климаттын өзгөрүшүнө жана миграция агымына даяр болуу;
- Санариптик билим берүүнү жана технологияны өнүктүрүү.
Аймак менен борбордун ортосундагы көпүрө болуп, элдин ишенимин ишке ашырам. Кыргыз Республикасын 2030-жылга чейин өнүктүрүү Стратегиясынын алкагында айыл жергесин өнүктүрүү үчүн максатталган иштеримдин багыттары төмөнкүлөр болот.
- Айыл чарбаны колдоого багытталган салык саясты, анын ичинде Жер салыгы;
- Жергиликтүү бюджетти колдоого багытталган бюджет саясаты;
- Айыл жерин өнүктүрүүгө багытталган каржы саясаты;
- Айыл продукциясын сатууга, экспорттоого көмөк көрсөтүү;
- Айылда билим берүүнүн деңгээлин көтөрүү;
- Медициналык тейлөөнүн сапатын жогорулатуу.
Менин демилгелерим:
- Кыргыз жана өзбек жаштары үчүн биргелешкен билим, спорт жана маданий долбоорлорду уюштуруу боюнча өкмөттүк программаларды каржылоо демилгесин көтөрүү;
- Эки элдин ортосунда чакан ишкердикти өнүктүрүү үчүн биргелешкен ишкерлер ассоциациясын түзүүгө көмөктөшүү;
- Тил жана маданият фестивалдарын өткөрүүгө мамлекеттик колдоону мыйзам аркылуу бекемдөө;
- Аралаш мектептерде эки элдин тилине тең колдоо көрсөтүү боюнча билим берүү саясатына сунуш киргизүү;
- Чек ара айылдарында коомдук биримдик борборлорун түзүү долбоорлорунун ишке ашуусун көзөмөлдөө.
№ 9 ОКРУГДУН НЕГИЗГИ МАСЕЛЕЛЕРИ ЖАНА МЕНИН ПЛАНЫМ
Биздин аймагыбыз – эмгекчил элдин, дыйкан менен малчынын маңдай теринен жаралган, чоң өнүгүү потенциалы бар аймак. Бирок, буга тоскоол болгон төмөнкүдөй системалуу көйгөйлөр бар: таза суу жана ирригация системалары эскирген, айыл жолдорунун абалы начар, бала бакча жана мектептер жетишсиз, жаштардын жумушсуздугу жогору, маданий жана спорттук объекттер аз.
Менин иш багыттарым — бул маселелерди чечүү үчүн тиешелүү мыйзамдык демилгелерди көтөрүү, каржылоо булактарын ачуу жана өкмөттүн ишин көзөмөлдөө аркылуу натыйжага жетүү:
- Суу коопсуздугу: жаңы суу түтүктөрүн жана насостук станцияларды курууга, эскирген ирригациялык системаларды жаңылоо, арыктарды бетондоо аркылуу суунун жоготуусун 30%га кыскартууга мамлекеттик бюджеттен каражат бөлүүнү демилгелөө.
- Сапаттуу жолдор: айылдар аралык жолдорду жана көпүрөлөрдү оңдоо үчүн атайын «Айыл жолу» фондун түзүү мыйзамын сунуштап, округдун айылдарына жыл сайын даректүү каржылоону камсыз кылуу.
- Билим берүү жана ден-соолук: 5 жылдын ичинде 5 жаңы мектеп жана 10 бала бакча курууну камтыган аймактык билим берүү программасын демилгелөө; ар бир айылга заманбап ФАП куруу долбоорлорун мамлекеттик каржылоо тизмесине киргизүү.
- Чакан ишкердик: айыл чарба кооперативдерине жана кайра иштетүүчү чакан цехтерге жеңилдетилген насыя алууга шарт түзүүчү мыйзамдарды демилгелөө. «Жаштар ишкердиги» программасы аркылуу гранттык колдоону камсыздоо.
- Өзгөн шаары: Өзгөндүн статусун райондук маанидеги шаарга көтөрүү боюнча мыйзам долбоорун даярдоо жана каржылоо механизмдерин иштеп чыгуу.